專玩控球在腳「巴」「西」決賽鬥磨

猪拉多纳

眾望所歸！洲際國家盃由巴西同西班牙爭奪冠軍，甚至可以當係出年世界盃決賽嘅預演都得，呢兩隊球壇霸主27年嚟首次喺正式大賽交鋒，雙方都會用控球磨死對手，所以等睇入波要有耐性！
防守能力成致勝關鍵

巴西自從2002年日韓世界盃奪冠之後，就冇得再呼風喚雨，巴西聯賽同歐洲聯賽冇得揮，甚至連巴西外援球員喺歐洲頂級聯賽搵食都冇以前咁搶眼。雖然係咁，巴西足球一直都係球迷至愛，所以每逢大賽，巴西例牌被捧為奪冠大熱門。今次佔盡天時地利人和，配合一班天才球員強勢彈起，「森巴軍團」為求捧盃點都會出盡全力。

西班牙近年崛起捧走兩座歐洲盃同一座世界盃，只要撼低巴西，就可以名正言順叫做足球王國。面對咁重要時刻，一向喺大賽歎慣慢板嘅西班牙，九成會同巴西鬥傳控戰術，咁就要睇邊隊嘅後衞有堅強防守能力同長傳視野，所以想睇入波真係要畀多啲耐性！