讚賞補出曉「飛」

猪拉多纳

　　昨日講開葉楚航行運，近期出路頻遇貴人，結果話口未完，繼第四場「威水福星」於排位朝補出列為正選後，昨日又輪到第五場「齊飛」後備補上，世事變化果真奇妙，似乎上天正造就機會予阿航首度稱王！

　　「威水福星」與「齊飛」相繼補出，勝負雖然跑過至知，不過多一駒參戰，便代表多一個機會，對於阿航爭取冠軍，怎計都是正面的。其中要特別留意「齊飛」，翻查晨課記錄，原來牠曾試谷草1000米閘及跑第三，場地性能早已仄準，今晚首次渡江作賽，部署擺明是有的放矢。幸好徐廐「金紫荊」臨時退出，令「齊飛」得以一展所長，排六檔靚位，又有莫雷拉坐陣，愈睇愈覺得對辦。

　　除葉楚航有運外，告東尼也得上天眷顧，第七場東廐有「牛精好友」列陣，此駒計實力本具可爭之道，可惜抽個九檔，機會即時大打折扣。說來巧合，同場廐侶「讚賞」適時補出，黃金一檔信手拈來，誠是一大優勢，再獲韋達操刀，贏馬呼聲更是高唱入雲。以馬論馬，「讚賞」跑谷草1200米最有根據，同程累積四贏三位的佳績，有望替小告爭取頭馬。賭博士