烏拉圭4強再掃克

猪拉多纳

收服小狂牛信心滿瀉

假土耳其舉行的世青盃今晚爆發兩場4強大戰，亞洲代表伊拉克U20於尾場火併異軍突起嘅烏拉圭U20，伊拉克分組賽至今5戰不敗，不過連續兩場淘汰賽都要踢加時，球員開始有疲態。烏拉圭上圈淘汰頂頭大熱西班牙盡顯功架，球隊上下目前信心爆棚，相信可替伊拉克今屆神奇之旅畫上句號，1.74倍客W捧得過。

（無綫翡翠台及now 801周四凌晨2時直播）

兩軍上圈都要踢足120分鐘先至淘汰對手晉級，當中以烏拉圭氣走頂頭熱門西班牙較令球迷意外，但有睇直播嘅朋友應該認同，烏拉圭贏波唔係靠符碌，佢哋唔單止成功擋住西班牙嘅Tiki-taka攻勢，而且當首席射手尼高拉斯盧比斯於前線「啞火」，後備席上仲有「長人」阿雲拿迪擔當秘密武器，大把招式可變，足以應付唔同類型對手。
伊拉克兩場加時腳仔軟

烏拉圭自從分組賽首仗不敵克羅地亞後，之後4場比賽只失1球，強如西班牙都咬佢哋唔入，防守有一定板斧，反而伊拉克今屆雖然保持5戰不敗，但有4場比賽都有失波，上場對南韓更曾試過3次領先都被追和，論穩健程度明顯差一截。

況且伊拉克對上兩場都要踢加時，同時又比烏拉圭少一日休息，講體力亦蝕章，就算有主力阿布度拉謙停賽完畢可以復出，對爭勝亦幫助不大，烏拉圭可望於法定時間內解決對手。