法國加納爆金靴「大」戰

猪拉多纳

射手着晒火鬥爭士哥

喺土耳其舉行嘅世青盃，眨吓眼就嚟到4強階段，今晚焦點戰自然係奪標大熱法國U20火併加納U20，兩班波晉級過程都展現強大火力，分別入咗13同12球，兩軍射手法國嘅耶耶辛洛高同加納嘅艾舒夫亞亦同樣入咗4球，距離射手榜一哥位只差一球，今晚呢場準金靴大戰仲要撞正加納有3名防守主力停賽，梗係捧1.57倍入球大啦！

（無綫明珠台、TVB網絡電視01頻道、now801台及中央5台周三晚11:00直播）
「高盧小雞」個個識入波

兩隊同樣喺A組出線殺入淘汰賽，當日分組賽交手法國輕勝3:1，之後高盧雄雞取得小組次名晉級，再接連大炒土耳其同烏茲別克。而加納雖僅以較佳第3名成績出線，但之後先後擊退實力強勁嘅葡萄牙同智利，同樣顯示超級實力。

兩班波最令力奇欣賞嘅係擁有強大火力，法國5戰入13球，平均每場入2.6球，陣中除咗阿仙奴新兵耶耶辛洛高已經入咗4球，排喺射手榜次席外，原來已經有8名球員入過波，得分點真係防不勝防。
加納中後場3主力停賽

至於加納喺分組賽雖然跌跌撞撞，但去到淘汰賽，呢支09年冠軍即展現番強隊本色，依家5戰入咗12球。事實上，佢哋陣中除咗艾舒夫亞係射得之人，合共亦有7個球員開咗齋，要射爆法國大門又有幾難？當然，加納今仗有中堅羅倫斯艾迪、艾譚馬同中場奧迪積停賽，對防守有極大影響，想話同法國爭決賽席位始終難度唔細，但要博佢哋有波入爭口氣，同法國合演入球騷就絕對唔算貪心囉。
賽制

世青盃：現階段為4強賽事，如法定時間打和將加時30分鐘，未分勝負則互射12碼決勝。

自由盃、巴西盃：採主客兩回合制，自由盃為4強次回合、巴西盃為第3圈。如兩回合計打和，將計算作客入球優惠，未分勝負則在次回合法定時間後，以互射12碼決勝。

歐霸盃：採主客兩回合制，今輪為第1圈外圍賽次回合。如兩回合計打和，將計算作客入球優惠，未分勝負將於次回合法定時間後加時30分鐘，加時階段都計作客入球，再和則以互射12碼決勝。