莫帥回歸第一擊 車仔糟質「泰星」

猪拉多纳

英祿囝囝唔撐自己人

英超仲有成個月先開咧，但各隊已經展開熱身賽之旅，車路士今晚喺曼谷同泰國明星隊踢熱身賽，連泰國總理英祿嘅囝囝都會入場支持！小妹預期莫連奴喺呢場回歸首戰，除咗用林柏特等主力孭飛外，亦會試試年輕球員實力，盧卡古同舒賀爾尼幾個肯定會騷哥利博賞識，車仔讓兩球照捧1.95倍「讓客」。

（亞視國際台周三晚9:00直播）

雖然費托、大衞雷斯等球星因為踢完洲際盃延長假期而未歸隊，不過車路士今場陣容絕對唔差，除咗泰利、林柏特等巨星外，小妹認為一班後生仔都非常有睇頭，當地波飛價錢由800泰銖（約200港元）起，算抵睇啦！
年輕球員爭位唔搏唔得

先講上季外借西布朗勁入17粒嘅盧卡古，呢位前鋒講明會施展渾身解數爭正選，佢嘅身位同速度曾令唔少英超後衞吃盡苦頭，今次面對主要由亞洲球員組成嘅泰國明星隊，相信可以予取予攜。唔只咁，除咗夏薩特極有機會佔一席位外，新援舒賀爾尼最擅長快速反擊，亦啱晒莫連奴口味，由佢拍住盧卡古同夏薩特，要省多幾粒，唔難吖！

「藍戰士」唔止有實力，亦都識谷人氣，佢哋前日派盧卡古、麥伊治蘭、奇雲迪布尼同埋加利卡希爾，去足球學校教51位小朋友踢波，英祿個囝囝Pike亦身在其中，呢位11歲小朋友話喺偶像身上獲益良多，仲話會入場撐「車仔」，覺得明星隊唔會贏到喎！連自己人都唔撐，明星隊輸少粒已經要還神。

雖然泰國明星隊上仗爆大冷以1:0擊敗曼聯，令53歲嘅泰國名宿皮耶蓬（Piyapong）話覺得明星隊可以贏埋車路士，但小妹就覺得「紅魔鬼」上仗實在太不濟，除咗韋碧克不斷浪費機會之外，中場亦冇人支撐大局，反觀「藍戰士」有林柏特、艾辛呢班球星壓陣，門將嗰瓣除咗施治外，仲有老將舒華沙任後備，就算明星隊有蒙通聯前鋒鄧達壓陣，都未必可以拎到「士哥」。