細哨恨捧盃撐明尼路

猪拉多纳

南美自由盃決賽首回合聽朝上演，巴拉圭嘅奧林比亞會喺主場對明尼路，受讓平半都要唔過，原因係近年自由盃畀巴甲球會玩晒，對上3屆全部由森巴球會捧盃，加上朗拿甸奴講到明恨捧盃，踢自由盃又特別醒，上盤博得過！

（有線61、201及廣東體育周四早上8:50直播）
奧林比亞會缺乏星味

睇番紀錄，以往巴拉圭球會6次躋身自由盃決賽，竟然全部由奧林比亞會包辦，期間佢哋贏過3次，今場仲好早賣晒飛，預計首回合已淨袋210萬美元收入。不過咁，奧林比亞會比較有戰鬥力嘅，只得由SC巴斯隆拿回歸嘅射手卡路士費雷拉，就算佢哋喺8強兩回合計以2:1淘汰富明尼斯，都唔代表有把握食得住巴甲對手。

至於首次入決賽嘅明尼路，日前喺聯賽就收起晒射手祖奧、王牌朗拿甸奴同中場班納特安尼斯奧。細哨仲喺twitter同球迷講，冇嘢重要過攞自由盃冠軍，又自爆呢排好畀心機練波。大家知啦，細哨今屆自由盃上陣12場入4球交出8次助攻，佢話明搏命，一於再追撐上盤！
賽制

南美自由盃：賽事採取主客兩回合制，作客入球不被計算。今輪為決賽首回合賽事。若兩回合賽和，會喺次回合後加時30分鐘，再和則互射12碼分勝負。