效法葉韋潘三人組

猪拉多纳

　　今季東廐除了與一些華將擦出火花，尚有少部分頭馬由洋將經手，例如杜利萊、巫斯義、柏寶、韋達及薛寶力等等，證明練馬師用人方面，唔一定係單靠蔡明紹。

　　話就話，師徒關係存在互信，起碼聽教聽話，唔會亂嚟，我講東，你唔會講西，但以目前蔡明紹騎技，係咪值得委以重任？真係有商榷餘地。蔡明紹比賽時跑錯馬，唔係久唔久一場，呢點大家心裏有數。

　　如果東廐矢志爭冠軍，用人方面要更加平衡，應該與其他好手合作，甚至效法葉楚航馬房，時而用潘頓出擊，時而用韋達搏殺，達成「葉韋潘三人組」的效果。