墨西哥捧細抵過Ｗ

猪拉多纳

千里達表現對辦頂到半場

假美國舉行的美洲金盃8強戰展開，衞冕冠軍墨西哥鬥千里達。墨西哥自從首場分組賽落敗後演出漸入佳境，不過千里達嘅穩守突擊戰術發揮亦唔錯，今屆兩次「讓球主客和」受讓都能贏盤而回，墨西哥主W太熱唔抵玩。踏入淘汰賽階段，估計大家都會踢得較為保守，捧細盤及「半場和」為佳。

（有線61及64台周日早上6時30分直播）

墨西哥今屆首場分組賽意外輸畀巴拿馬，好彩之後連贏加拿大及馬提尼克成功出線，不過佢哋上場面對實力一般嘅馬提尼克都要失波，足證防線唔算太穩陣。千里達分組賽勝和負各一，以B組次名出線，表現尚算合格，中鋒堅韋尼鍾斯具衝刺力，最啱球隊打反擊，佢哋之前對薩爾瓦多及洪都拉斯都係「讓球主客和」受讓一方，結果兩次都能贏盤而回，被睇淡之下發揮似乎更為理想。
8強名單可換4人執靚隊波

金盃賽制比較特別，每隊踢完分組賽後有權更換最多四名參賽球員名單，墨西哥就踢走後衞達雲查維斯，改以中場卡迪拿斯頂上，千里達則用効力哥倫布機員嘅中場奇雲佐治代替表現低沉嘅卡廉希蘭，雙方領隊顯然都對球隊表現心中有數。去到淘汰賽階段，估計初段大家都唔會太冒進，除咗捧1.85倍入球細之外，「半場和」有2.25倍亦值得一試。

順帶一提，同日仲有一場馬會冇開盤嘅8強戰由巴拿馬鬥古巴，巴拿馬分組賽不敗力壓墨西哥首名出線，表現充滿說服力，古巴則全靠最後一場於補時階段攻入關鍵一球，先以較佳得球壓過馬提尼克成為最佳小組第三名之一，晉級帶幸運成分，今場想再爆冷唔容易。（周日凌晨3時30分開賽）