紅魔神箭回歸 勢炒澳職明星

猪拉多纳

熱身賽首戰落筆打三更嘅曼聯，今日黃昏嚟到季前之旅第2擊，作客悉尼嘅安聯體育場同澳職明星隊交手，趁主隊以迪比亞路為首嘅3大巨星齊齊缺陣，睇怕有望幫新帥莫耶斯開齋省招牌。特別係紅魔鬼今鋪有射手尹佩斯回歸，就算佢踢唔足全場，都一樣炒得起，捧1.67倍「讓客」啦！（now632台周六下午5:30直播）
操多1個禮拜開始上力

紅魔鬼上周末喺曼谷不敵泰國明星隊，表現令人失望，真正具威脅射門唔多，球員明顯未上力。不過話晒都操多一個禮拜，球員狀態無論如何都會有所提升。再者，兩名星級主力包括前鋒尹佩斯同迪基亞都已經歸隊，雖則話迪基亞預計今晚上陣機會唔大，但莫耶斯話明下半場會用尹佩斯，有佢落場成班波把握力即時大幅提升，就算韋碧克同韋費特沙夏射極唔入，都有佢後備登場入夠數啦！

主隊呢邊，話就話澳職明星隊，不過講真，一粒星都唔見囉！超級三星迪比亞路、希斯基同小野伸二因為休季當中，梗係唔會趕返嚟同你踢呢場表演賽啦！最慘係搵完球迷投票揀人做代表，選咗出嚟又再發現，高票入選嘅墨爾本勝利中場馬高洛查士已經過檔史特加，中岸水手老將中堅施雲斯域克又已經掛靴，今晚都唔符合資格披甲。
「澳星」冇星齋靠老弱殘兵

最慘係今日仲有東亞錦標賽等國際賽開打，澳洲腳艾奇湯臣又話唔踢得，家陣明星隊唯一孭到飛，咪係已經34歲畀澳洲國家隊「遺棄」嘅前布力般流浪中場艾馬頓做隊長囉。仲有一點，澳職家陣都係放緊假，球員狀態衰過之前泰國明星隊多多聲，今晚就算全場坐滿84,000觀眾，佢哋多數又係嚟撐紅魔多過捧自己友，連聲勢都輸埋，澳職明星隊想輸少球都難啦！