馬哥法比安弗爆撐墨西哥

猪拉多纳

美洲金盃進入8強淘汰賽階段時，每支球隊都可喺23人名單中換走4位球員，當中美國就用盡4個換人名額，所以各位朋友落注前先最好要留意各隊變動。千里達賽前就有主力卡廉希蘭退隊，聽朝點頂得住回勇嘅墨西哥，2.02倍「讓球主勝」要追。（有線61、64、201及203周日早上6:30直播）
千里達主力卡廉希蘭退隊

咪以為千里達上場贏洪都拉斯兩球就好醒，其實係對手一早出線收起多位主力所致。賽前千里達足總宣布同比利時球會亨克有協議，踢足3場正選嘅中場大將卡廉希蘭要退隊返球會報到，焗住補入哥倫布機員中場奇雲佐治，咪話唔打擊球隊士氣。加上中場悍將奇雲莫連奴今場停賽，難怪領隊史堤芬赫特都呻後備人腳不足難與其他球隊抗衡。

墨西哥首戰輸畀巴拿馬後，即時回勇連贏兩場殺入8強。當中連續3場分組賽都有波入嘅射手馬哥法比安（右圖左）就講明，首戰輸波後對畀人抽水唱淡感到好嬲，所以嚟緊每一仗都要踢爭氣波攞冠軍咁話，咁有鬥心一於撐佢哋大勝士氣低落嘅千里達。