「馬明」志在交學費 車路士做大騷氹球迷

猪拉多纳

車路士亞洲之行第二擊今晚假吉隆坡上演，佢哋會同馬來西亞明星隊進行表演賽。「藍戰士」抵達馬來西亞之後掀起撲飛潮，當地唔少球迷都掉轉槍頭撐「車」，領隊莫連奴亦都承諾Good Show娛賓，面對志在學嘢嘅「馬明」似係大炒格，讓到3球照捧1.8倍「讓客」。

（亞視本港台周日晚9:45直播）

馬來西亞《新海峽時報》上周三搞免費派飛活動，幾百位球迷烈日當空之下排足超過4粒鐘隊攞波飛，唔少Fans都話今場波係撐莫連奴同車路士，未開波「藍戰士」已經先贏一仗。禮拜三飛抵吉隆坡國際機場嘅車路士大軍，當日行VIP通道鬆人，可能覺得對唔住專程接機嘅球迷，「寸王」前日開記者會時承諾會踢番場極具娛樂性嘅好波回饋Fans，莫帥開到口，班手足又點敢懶懶閒吖！
唔使預林伯 生牯仔搏殺

車路士喺亞洲之行第一擊小勝泰國明星隊1:0，莫連奴話隊波後防係就係穩陣，但埋門機會就唔夠多同入肉，但經過操練後已經度咗幾條橋對症下藥，又會繼續考察球員表現，預計上仗一箭定江山嘅盧卡古、新兵舒賀爾尼同表現備受激讚嘅奇雲迪布尼實會搏老命爭「士哥」，即使繼續有一眾踢完洲際盃嘅國腳缺陣，「寸王」又講明林柏特响亞洲之旅都要養傷唔會Show up，但戰鬥力同鬥心都贏「馬明」幾條街。
馬來西亞4件主將難披甲

對家「馬明」主要由馬來西亞國腳組成，呢班波自1974年成立以嚟踢過27場表演賽，當中只贏過1場，最慘係右閘馬哈利、中場拉特斯等4件主將都未必出得。兼任明星隊同國家隊領隊嘅拉查高柏備受下台壓力，佢最近帶領國家隊同泰國嘅春武里拍跳互交白卷，激到Fans紮紮跳，賽前又話今仗志在學嘢，似乎打定輸數等劏。