日本挽面子唔放過澳洲

猪拉多纳

東亞錦標賽今晚由日本對澳洲，兩隊同樣唔齊腳，但相比之下，日本嘅贏波動力明顯較大，佢哋喺首戰以3:3打和中國，收視率仲高過當日嘅日本參議院選舉直播，全東瀛睇實佢哋，試問點可以一衰再衰？捧日本1.8倍W！（now633及635台、廣東體育、中央5台周四晚7:00直播）

日本完場前被國足連追兩球扳平，搞到畀東瀛球迷笑佢哋可能連泰國都打唔贏，都算幾恥辱，不過佢哋能夠喺開波4分鐘落後，一度反超前3:1，證明呢班日本「三隊」球員，質素夠打東亞賽有找，當中大阪櫻花新王牌柿谷曜一朗，首次登場更加交出1個入球同1次助攻。

柿谷曜一朗有料到人氣升
柿谷曜一朗入波後人氣繼續爆升，東瀛球迷更加睇好佢，可以追平日本傳奇釜本邦茂加入國家隊後，連續兩場入波嘅紀錄，甚至連續3場建功創造新傳說，要知道日本對中國嘅關東地區18.9%收視率，高過日本參議院選舉直播嘅16.5%，咁多人睇住，相信日本唔會Hea踢。

另一方面，澳洲同日本一樣冇大牌球星壓陣，就連名古屋鯨魚中鋒約舒亞堅尼地，都因為球會唔放人冇歸隊，大家噏得出嘅球員可能得射手艾奇湯臣、中場麥特麥基同後衞米利根，不過澳職同日職水準始終有距離，旨意佢哋搶分唔實際，澳洲打和南韓0:0後好難再有運行。