北韓女足踢法硬淨

猪拉多纳

o架妹唔慌多攻「細」
今日女足東亞賽預演冠軍爭霸戰，由日本對北韓，呢兩班波各有千秋，實力高半線嘅日本妹，贏面雖然大啲，但係想炒起對方好難，買1.52倍入球細穩陣過1.6倍主W。（now633及635台、廣東體育周四下午4:15直播）

安藤梢向岡崎偷師
日本及北韓首戰都W出，壓軸嗰場波只係對南韓同中國，贏就梗o架啦，所以今日邊隊攞晒3分，理論上等於攞咗冠軍，雙方點會唔死砌吖！從往績去講，日本近6次中立場打北韓，取得3勝3和未輸過，自然值得睇高些少，尤其佢哋個中場安藤梢過去入過北韓3球波，今次仲特別研究岡崎慎司嘅入球錄影，希望從中偷師，畀日媒形容為「北韓殺手」，單睇呢兩項數據，「o架妹」贏係好正常嘅事。

問題係北韓班人以硬淨出名，連日本主帥佐佐木則夫都讚佢哋嘅「體力同鬥志拍得住歐洲隊」，日本女足要贏都唔係咁輕易。何況佢哋個後衞有吉佐織右腳有啲事，要由山崎円美頂上，左閘亦換咗上尾野邊，或者會踢得仲保守一啲，開細有乜奇？