櫻花今鬥曼聯有雞偷

猪拉多纳

朗尼留隊？
曼聯亞洲之旅來到第四站，今晚會鬥另一支日職球隊大阪櫻花。紅魔鬼上仗不敵橫濱水手損兵折將，尹佩斯、韋碧克同告勇戰受傷，前線剩低連格、韋費特沙夏等新仔孭飛，面對近期主場氣勢甚勁嘅大阪櫻花難言勝，波童捧「讓球主勝」。

（now 632及621周五晚6時直播）

連格衝鋒有心無力
該隊一眾前鋒今個夏天認真當黑，除咗朗尼早前因傷提早返英，尹佩斯及韋碧克上場對橫濱水手時又告受傷，為安全起見今仗應該唔會披甲。雖然新仔連格連續兩場有士哥，不過雙拳難敵四手，單憑佢喺前線衝鋒陷陣攻力始終有限，加上剛剛歸隊嘅香川真司仲未上力，前線真係冇咩板斧入波。

近三場兩次輸波的曼聯，球員踢來明顯信心不足。大阪櫻花今年所有主場賽事只輸過兩次，單計近七場贏咗六場，主場氣勢唔可以睇小，就算有柿谷曜一朗、山口螢及扇原貴宏因代表日本參加東亞錦標賽而缺陣，乘紅魔鬼態沉依然有力一戰，「讓球主客和」曼聯讓一球捧唔過，一於揀櫻花「讓球主勝」。