紅魔Show Quali摘櫻花

猪拉多纳

香川真司榮歸畀足面
喺季前熱身之旅3戰2負嘅曼聯，今晚轉戰日本大阪，再唔交貨將令新帥莫耶斯面對沉重壓力，好彩今晚佢哋對手大阪櫻花係紅魔中場主力香川真司母會，今鋪香川仔衣錦榮歸，母會睇怕點都唔會為難佢哋。再加上櫻花包括首席射手柿谷曜一朗等3名主力被抽調去踢東亞錦標賽，實力大減點頂得住曼聯吖？力奇捧1.68倍「讓客」！

（now621及632台、廣東體育周五晚6:00直播）

尹佩斯或踢得 楊格復出
紅魔嘅季前熱身之旅先後不敵泰國明星隊同橫濱水手，僅只擊敗殘陣出擊嘅澳職明星隊，今鋪嚟到對大阪櫻花本來都唔會易打，特別係射手朗尼受傷退隊，王牌尹佩斯上仗又話拉傷大腿，好彩有消息話佢傷勢唔算嚴重，今場或者有望披甲。

其實紅魔仲有王牌香川真司孭飛，香川仔未喺多蒙特發威前就係効力櫻花，今晚返嚟母會，斷估自己人點都唔會逼得佢太緊。冇錯，呢個「極品壽司」上仗對水手表現麻麻，明顯未上力，不過熱身過後，狀態點都有所回升，今場應該有貨交。至於話怕前線冇人入波，至少英格蘭國腳韋碧克都已經開齋，射術見到進步，加埋新兵韋費特沙夏同小將連格都係射得之人，今仗仲話有艾舒利楊格復任正選，肯定有大把輸送，要攻破櫻花大門應該唔難。

櫻花新星射手缺陣
目前喺日職排第5嘅櫻花，論實力當然唔曳，不過衰在佢哋有前鋒柿谷曜一朗、中場山口螢同後衞扇原貴宏畀日本隊徵召去踢東亞錦標賽。要知道櫻花今季喺聯賽17戰入27球，其中10球就由超新星柿谷曜一朗攻入，冇咗佢幾乎等於自斷一臂，加上中場吉野峻光及後衞本多勇喜又因傷缺陣，陣容不整憑乜頂得住曼聯先？