曼城 新特蘭火併爭霸

猪拉多纳

「智利工程師」精銳盡出 「狂人」心高氣傲
今晚巴克萊亞洲錦標賽爆發重量級決賽，由星光熠熠嘅曼城火併「黑貓」新特蘭。曼城經歷早前南非兩連敗後，新帥比歷連尼剛遇「丁母憂」亦忍痛來港領軍，可見曼城對此行高度重視，賽前比帥話決賽會人盡其才，如祖維迪、捷西斯拿華斯等「新利劍」有機會初露鋒芒，面對由「狂人」迪肯尼奧掌帥嘅新特蘭，儘管曼城質優有望在港捧盃，但一場入球騷亦在所難免！

（now 621及632周六晚8時30分直播）

雖然曼城上仗只係小勝南華一粒，但比歷連尼大都沿用上季嘅班底，只係起用費蘭甸奴同尼格度兩員新兵，不過中場核心耶耶托尼大讚比帥卓越嘅管理能力，暗示與上季搞到四分五裂嘅文仙尼相比，呢位「智利工程師」能鎮得住一班球星，令內部更加和諧。今夏曼城大事擴軍，買入費蘭甸奴、尼格度、祖維迪及捷西斯拿華斯，佢哋年輕兼具備唔少經驗，連一向得罪人多稱呼人少嘅車路士領隊莫連奴，都大讚呢班新兵有料到，可望衝擊英超錦標。

「藍軍」新兵搏盡求上位
曼城實力強橫之餘，板櫈深度亦非常高，淨係中前場就有阿古路、迪斯高、尼格度、大衞施華、捷西斯拿華斯、祖維迪、拿斯尼等球星，新季各人爭位情況激烈，比帥話今次賽事會盡量給予球員比賽機會，相信眾將會搏到盡，特別係仲未亮相嘅新兵祖維迪及捷西斯拿華斯，一定趁機在比帥面前「騷哥利」。

新特蘭首仗3比1反勝熱刺狀態唔錯，攻守速度幾快，只係新箭頭艾迪杜里把握力麻麻，今仗對住防守嚴密嘅曼城，未必有咁多機會畀佢揮霍，「藍月亮」注重控球，希望用傳波搓散對手，好容易消耗「黑貓」嘅體力，不過領隊迪肯尼奧出名心高氣傲，球隊對住曼城都會「落柯打」搶攻，所以就算曼城實力優於對手可秤先，但新特蘭亦非善類，相信今晚會有一場「鬥士哥」嘅激戰！