哥帥新季第一擊 拜仁滅蜂顯顏色

猪拉多纳

一隊操Fit晒 一隊未上力
拜仁慕尼黑上季稱霸球壇，新帥哥迪奧拿能唔能夠延續舊帥軒歷基斯嘅霸業，真係要拭目以待。嗱，哥帥今晚就會遇上接掌拜仁後首個大考驗，喺德國超級盃硬撼多蒙特，「蜜蜂兵團」未操起不特止，仲要甩皮甩骨，季前賽贏到開巷嘅拜仁當然可以秤先，呢場「歐聯決賽翻版戰」拜仁讓平半，梗係要上盤啦！（有線61及201周日凌晨2:30直播）

今仗係新球季首場正式比賽，而且又有兩隊去屆歐聯決賽分子孭飛，所以足足有195個FIFA成員國轉播呢場波，可容納超過8萬人嘅多蒙特伊度納訊號公園球場，截至本周三亦只係賣剩兩千張波飛，預計今晚肯定坐爆。德國足總為隆重其事，前日特別舉行超級盃記者會，食住個勢宣傳吓德甲，拜仁、多蒙特兩邊嘅體育總監森馬同蘇錫，亦都承諾雙方會遣強陣爭盃，對今場波極度重視。

奧巴美揚感冒菌入腸
上屆超級盃以2:1砌低多蒙特嘅拜仁，由6月底開始踢熱身賽，場場都大數低組別球隊之餘，仲先後砌低慕遜加柏同巴塞捧走電訊盃同漢尼斯盃，成班球員都上晒力。好似西班牙國腳查維馬天尼斯喺漢尼斯盃都坐足全場冷板，賽前佢話只要有得落場唔介意踢埋中堅，睇得出班手足為取悅哥帥肯定唔會揸流。

早排喺瑞士集訓嘅多蒙特，上季無論喺德甲定歐聯都畀拜仁騎住，想報仇就梗o架嘞，不過會方賣走馬里奧葛斯之後，戰鬥力大受削弱，最弊係中場米希達利恩右足踝韌帶受創倦勤，同樣係新加盟嘅射手奧巴美揚亦因為感冒菌入腸未必出得，加上「蜜蜂兵團」過去5次鬥拜仁只係得2和3負成績，人腳、往績都明顯比對家輸蝕，點睇都唔似報到仇喎！

德超盃賽制：
賽事一場定勝負，雙方在90分鐘內打和，不設補時，即互射12碼分高下。