畀南韓玩謝日本「大」報復

猪拉多纳

東亞錦標賽今上演終極戰，東道主南韓喺首爾對日本，2.2倍入球大抵玩。南韓教頭洪明甫上任後，連續兩場同對手互交白卷，今晚肯定諗辦法入波，至於日本教頭沙哲朗尼，就覺得韓國玩佢哋，成肚火當然會「大」報復！

（now633及635台周日晚7:00直播）

南韓對住澳洲同中國，喪攻兩場都冇斬獲，但教練洪明甫上年帶領南韓U23，曾經喺倫奧足球季軍戰以2:0打沉日本U23，今場應該有計入波。事實上，賽前洪明甫講到明，今次東亞賽最重要目標就係要贏日本，而且得2分嘅南韓和波都唔掂，一定要贏波至有機會捧盃，更加有利開入球大。

冇得閉門操練沙帥火滾
日本方面，佢哋去到韓國嬲到震，除咗不滿記者會唔准日本翻譯員入場，又唔准日本隨軍大廚入酒店廚房準備食物外，最令沙哲朗尼火滾嘅，就係南韓安排嘅練習場任睇唔嬲，想閉門操練根本冇可能，上場日本以3:2砌低澳洲，沙哲朗尼幾乎收起晒啲主力，擺明要同南韓鍊過，新王牌柿谷曜一郎復出隨時又入波。

國足飄忽讓唔起澳洲
至於頭場澳洲對中國，就冷敲澳洲1.46倍「讓球主勝」。雖然冇爭標機會嘅澳洲講到明會大變陣，安排好多未出過場嘅球員玩吓，但國足表現永遠估佢唔到，當大家以為佢哋對日本同南韓唔使輸，好似有啲起色嘅時候，隨時又累人輸餐死，中場黃博文同中堅杜威停賽博唔過！

（now633、635台、廣東體育及中央5台周日下午4:15直播）