曼聯發惡搶W 傑志越級挑戰

猪拉多纳

苦等8年 魔氣再襲大球場
英超勁旅訪港好戲在後頭！送走咗三支參加巴克萊亞洲錦標賽嘅英超球隊曼城、熱刺及新特蘭後，全球最受歡迎嘅球隊兼上季英超盟主曼聯今晚壓軸亮相，將於夜晚8點喺香港大球場火併香港球隊傑志。紅魔鬼今次亞洲之旅戰績認真麻麻，對上4場僅得1勝，嚟到最後一站為保金漆招牌肯定搏老命，主帥莫耶斯昨日操練時更親自落場催谷球員，態度認真加上戰意高昂，誓以一場漂亮勝仗結束亞洲之行，因此呢場大戰無論係咪紅魔粉絲都唔可以錯過！

（無綫明珠台周一晚8時直播）

尹佩斯將正選掛帥
曼聯自90年代起曾經3次訪港，先後兩勝南華及一次擊敗港聯，今次佢哋亞洲之旅成績唔算太理想，先以0比1輸畀泰國明星隊，之後雖然大炒澳職明星隊，但去到日本踢兩場又只係錄得1和1負，整體表現絕對唔收貨，新帥莫耶斯話冇壓力就呃你。球隊今次亞洲之行晨早有朗尼受傷提早返英，日本球星香川真司對完大阪櫻花又突然宣布再次休假，未有隨隊訪港，唔少香港球迷都擔心曼聯今站會收起部分主力「揸流攤」，但係睇過昨日早上一課操練，一眾紅魔操得好落力，各位「魔粉」應該可以放心。

曼聯昨晨喺將軍澳運動場操練，之前報稱受傷嘅尹佩斯及韋碧克都有落場參與分隊賽，雖然走動相對較少，但似係保護性質居多，預計今仗仍可正選披甲。至於門將方面，迪基亞只係單獨加操，狀態似未十足，相信莫耶斯會在連迪加特及賓艾莫斯之間揀其一。值得一提，曼聯新帥莫耶斯昨晨亦有穿上波砵運動裝參與操練，態度一絲不苟，領隊都咁認真，球員又點敢放鬆。

已經晉升為教練兼球員嘅傑斯既係最早入場，亦係同教練團收拾皮球後最遲離開嘅一位，專業態度令人敬佩。收操前佢同仲同新星湯卡華利鬥射門楣「私片」，結果「薑係老嘅辣」，傑斯技術之高真係唔到你唔服。

巴塞踢法負隅頑抗
傑志方面，雖然話今場只係為備戰9月17日亞協盃作客約旦嘅其中一課，然而呢支巨人殺手過往亦曾有殺敗AC米蘭同踢和祖雲達斯嘅紀錄，球隊早前特別拉隊到上海備戰一星期，新帥高美斯表示，他一定會排出最強陣迎戰，並要求球員盡情發揮，務求要逼曼聯使出真功夫。