里昂1.93倍細抵過Ｗ

猪拉多纳

射手扭計 鋒力冇保證
今晚上演多場歐聯外圍賽第三圈首回合賽事，法甲沒落豪門里昂喺主場迎戰瑞士球隊草蜢，論歐戰經驗里昂梗係贏幾條街喇，但由於莫財關係，里昂希望放走前鋒巴菲迪比高美斯套現，結果雙方鬧得不愉快，呢位射手今仗未必披甲，勢必影響前線火力，草蜢作客以穩行先，主勝太熱，寧願轉玩入球細。

（周三凌晨3時開賽）

與財雄勢大的聖日耳門及摩納哥唔同，里昂同其他法甲球隊一樣，備受財政困擾，又要為建新球場籌錢，今夏先後賣走主力洛夫雲及雷維李尼，由於前鋒巴菲迪比高美斯合約剩番一年，高層唔想佢下年以自由身走人，搞到人財兩空，焗住今夏要將佢放售，雙方鬧得極不愉快。仲有一點，若果里昂想將高美斯賣畀參與歐聯球隊，今仗更加不會派佢上陣，費事賣唔出好價錢。

巴菲迪比高美斯上季聯賽攻入十六球，係里昂前線最強火力點，如果冇咗呢位高大中鋒助陣，得番阿根廷前鋒利辛度盧比斯獨力難支，里昂攻力絕對大打折扣。

草蜢鐵桶陣博摸和
另一邊廂，瑞士超已經開咧，草蜢球員嘅狀態逐漸上力，始終該隊實力、經驗方面都較里昂遜色，首回合作客應該會大踢穩陣波，擺出鐵桶陣博和波，絕不會貿然同對手鬥攻，戰情隨時陷入膠着狀態，主勝得1.28倍太熱冇肉食。既然里昂啞火、草蜢死守，今仗唔慌多波入，細盤有1.93倍更抵玩。