曼城玩4P夠贏AC

猪拉多纳

巴神Hea爆倒戈靠唔住
季前熱身賽奧迪盃今晚喺慕尼黑安聯球場開打，頭炮曼城鬥AC米蘭，焦點除咗巴洛迪利倒戈，仲有曼城4位身價總值接近1億鎊嘅新兵會輪流上陣。「腦殘」離曼城加盟AC後大踢爭氣波，本應做番齣好戲畀舊東家睇，可惜佢剛啱傷愈冇乜狀態，估計Hea踢居多。而曼城喺比歷連尼領軍下剛剛喺香港贏咗巴克萊亞洲錦標賽，「初試」雖然合格，但會盡快讓4位「P牌仔」同舊將磨合，而今次奧迪盃就係最佳演習。以曼城人腳之鼎盛，足以贏AC闖決賽。

（有線61及201台周四凌晨零時15分直播）

比歷連尼繼續要交貨
曼城雖然喺巴克萊亞洲錦標賽兩戰都只係小勝一粒，但經過「薯仔田」嘅考驗，加上其中一支對手同屬英超嘅新特蘭，練兵強度高，有助加快提升狀態。新帥比歷連尼執掌呢支富豪球會，壓力非常大，需要盡快做出成績以服眾。參加奧迪盃呢類高水準熱身賽，正係佢向老闆文疏亞展示一下功力嘅良機，心態上同應付正式賽事冇乜分別。

由於比歷連尼家陣仲係「掛緊P牌」，地位仲未穩固，因此一定要交出成績，而球員方面一樣要踢好波爭正選，事關曼城今夏豪花9,760萬鎊（約11.5億港元）簽下費蘭甸奴、尼格度、祖維迪、捷西斯拿華斯4大猛將，令內部競爭非常激烈，舊將如果唔想來季坐冷板，就必須趁熱身賽盡騷哥利，而今仗估計比帥會盡可能派4位新貴登場，甚至有可能擺出4P新陣以作測試。不過，無論個陣點擺，曼城呢支富豪球會喺整體人腳已甩開今非昔比嘅AC米蘭幾條街，加上戰意有別，故曼城勝算甚高。

阿里基唔博免添傷兵
相比之下，近年「家道中落」嘅AC米蘭班底冇乜大變化，整體實力甚至被評不增反減，而佢哋搏殺嘅心態唔及曼城，佢哋上仗熱身賽擊敗華倫西亞，但就搞到前鋒羅賓奴受傷，後衞邦利拿更需長抖3個月，呢次損兵折將肯定嚇怕教練阿里基，未來熱身賽難免會避重就輕，以免傷兵問題惡化，影響開季成績。因此就算今仗派巴洛迪利上陣，亦唔好期望佢會太大建樹。

AC新季人腳變動

In
安德列普利(中場) 由森多利亞來投

Out
耶比斯(後衞) 轉投阿特蘭大

沙利文(後衞) 轉投森多利亞

奧迪盃賽制
法定時間打和不設加時，立即互射12碼，勝方會跟拜仁及聖保羅勝方爭冠軍，負方則踢季軍戰。