祖記攞頭彩食拖肥糖

猪拉多纳

喺美國舉行嘅國際冠軍盃周四早上有場祖雲達斯對「拖肥糖」愛華頓。兩支球隊都喺七月有新兵加盟，相信雙方都會借今次美國之旅進行磨合。留意到祖雲達斯對呢項錦標相當重視，唔少主力球員都有隨隊飛去北美，預料可以喺首圈比賽攞威，主W可捧。

（now 632周四早上11時直播）

母公司銷售戰場 唔可以失威
今屆國際冠軍盃由英超、西甲、意甲及美職球隊進行角逐。其中一支參賽隊伍AC米蘭已經同華倫西亞踢咗首圈比賽。講番今場主角之一嘅祖雲達斯，「斑馬兵團」對於美國之旅高度重視，事關佢哋母公司快意旗下唔少汽車大品牌都係以美國作為主要銷售點，最佳例子當然係祖雲達斯球衣胸口印上嘅汽車品牌Jeep，今次去到母公司主要市場，祖記又點可以失威。

祖記今屆兩大新援泰維斯及洛蘭迪相信會粉墨登場，肯定會賣力，務求博取球隊高層信任。對手「拖肥糖」愛華頓於七月初羅致前韋根球員干尼、艾卡拉斯及祖爾盧保斯，三位都與新帥馬天尼斯合作過。從巴塞借用嘅迪路菲奧亦有質素，有助提升戰鬥力，但最擔心係莫耶斯離開後，愛華頓現有班底未必可及時適應，表現或多或少會打折扣，今場祖記主W有1.65倍可捧。

賽事簡介
國際冠軍盃由8支球隊角逐，參賽球隊包括東道主洛杉磯銀河、英超車路士及愛華頓、意甲祖雲達斯、AC米蘭及國際米蘭、西甲皇家馬德里及華倫西亞，除上周末已舉行嘅AC對華倫，其餘全部在美國舉行。賽事採淘汰制，法定時間打和不設加時，即以互射12碼決勝。賽事設有季軍戰及5至8位排名賽，即每支球隊至少要進行3場比賽。