中村發燒水手讓唔起

猪拉多纳

橫濱水手今晚喺日職主場對柏雷素爾，讓平半有暗湧，因為水手隊長中村俊輔最近發燒，即使好番狀態都唔慌好，相反柏雷素爾傷兵問題好轉，敲下盤着數。

（有線61及201周三晚6:30直播）

水手以3:2砌低曼聯嘅熱身賽固然好睇，可惜中村俊輔喺開波20分鐘已經因為唔舒服離場，即使今場好番領軍，狀態肯定唔多掂，特別係水手其他球員創造力有限，唔值得過分信任。雖然剛啱為日本出戰東亞錦標賽嘅前鋒齋藤學，特別要求喺今仗落場，唔需要專登安排佢放假，不過水手近期防線好曳，即使有本錢入波，都似會入埋唔夠後面輸。

另一方面，柏雷素爾都有射手工藤壯人參加東亞錦標賽，可能影響備戰，而且中場李安度杜明基斯因傷未踢得，不過其他傷兵已可候命，新加盟嘅射手基奧聯賽暫停前已經重拾射門觸覺，睇得出全隊狀態冒起緊，受讓博得過。