寸王倒戈要攞威！車仔撞瓜國米

猪拉多纳

上個星期先完成亞洲之旅嘅車路士，話咁快又飛去美國參加國際冠軍盃。經過3場亞洲季前熱身賽後，一眾「藍戰士」狀態顯著回升，加上其餘主力已經歸隊集訓，相信「寸王」莫連奴有力帶領球隊砌低舊東家國際米蘭，1.6倍主勝值得支持。（now632台周五早上8:00直播）

國米新兵冇卡士
車路士嚟亞洲踢熱身賽，由第一場小勝泰國明星隊1:0，到最後一場大炒印尼明星隊8:1，明顯見到班球員「上力」。當中射手盧卡古、丹巴巴亞等人亦已經開齋，有助提升信心。另外中場桑馬達、奧斯卡杜斯山度士，守將大衞雷斯等主力亦可候命，需知道莫帥選兵一向認狀態唔認人，佢哋想喺新球季保住自己嘅正選位置，聽朝落場肯定要交足功課。

「褪色勁旅」國際米蘭今季搵嚟前拿玻里主帥馬沙利救亡，球隊大搞「年輕化」，放走前鋒洛基、卡斯辛奴、中場史坦高域等經驗豐富嘅戰將。但補入嘅只係森多利亞前鋒莫路伊卡迪同帕爾馬鋒將貝科迪爾，射手迪亞高米列圖又會缺陣，咁嘅火力點攻破車路士大門？