阿積士頭威頭勢[-2]照炒

猪拉多纳

荷甲開鑼 洛達無錢增兵唔夠砌
今晚荷甲開咧戰，將會由力爭4連霸嘅阿積士喺主場迎戰洛達，主隊雖有唔少主力離隊，但呢支班霸喺季前熱身賽戰績及火力都所向披麾，要大炒對手照計冇難度，就算[-2]都照捧1.88倍「讓主」！（now670台周六凌晨2:00直播）

熱身賽6戰全勝勁入19球
阿積士已經連續3季奪得荷甲冠軍，好似隊長施安迪莊話齋，今季全隊會繼續齊心合力希望達成破球會紀錄嘅4連霸，開咧戰又點可以失威先？無疑佢哋有蘇利馬尼同賴恩巴布走人，艾錫古恩卡亦都已經返回巴塞，不過亦有前巴塞「神童」保贊加盟，加埋暫時成功留住基斯甸艾歷臣及射手史基賀臣，火力仍然相當有睇頭。睇佢哋近6場對住奧沙辛拿、雲達不來梅等勁旅嘅熱身賽獲得全勝，仲勁入19球只失2球，就知實力絕對高洛達幾班。

對手洛達上季幾乎降落荷乙，喺附加賽走得甩身固然值得欣賞，不過呢支球隊喺季前熱身賽話就話5場4勝，但對手只係史浩克04業餘隊同埋比利時球隊梅赫倫呢類弱旅，增兵方面亦都只係買入一堆「免費貨」似乎冇乜野心，咁嘅實力要留級已經有難度，對住班霸阿積士真係「聽炒」。