卡爾斯魯厄難逃狼噬

猪拉多纳

失超新星 弱過上季踢德丙
德國盃首圈卡爾斯魯厄主場越級挑戰禾夫斯堡，卡爾斯魯厄今季初升德乙，不過受財困影響無力擴軍，而且上季獲德丙冠軍嘅頭號功臣卡漢奧古已告離隊，目前實力比上季踢德丙時更弱，面對德甲「狼堡」禾夫斯堡唔夠砌，黑柴撐1.7倍客Ｗ。

（無綫翡翠台周日凌晨2時30分直播）

卡爾斯魯厄以上季德丙冠軍身份回升德乙，不過明顯靠晒卡漢奧古打江山，唔知大家仲記唔記得，本報「歐陸連線」喺年幾前已介紹過佢，卡爾斯魯厄接納漢堡提出嘅250萬歐元收購價，賣出呢位當時年僅17歲超新星，條件係要漢堡借番畀卡爾斯魯厄18個月，結果呢位有「新奧斯爾」之稱嘅進攻中場上季為球隊轟入17球另交出7個助攻，成為卡爾斯魯厄最佳球員，可惜佢借用期已滿，今季漢堡收回己用。

卡爾斯魯厄今夏仲將上季打起嘅另一德國U19新星中堅阿普甘馬賣咗畀賀芬咸，球隊攻守都弱過上季踢德丙之時，連表現出色嘅體育總監克魯沙都畀漢堡撬走埋。雖然今季喺德乙已兩戰不敗，但對手唔叻，兩仗加埋只靠一次角球製造機會頂入一球，組織進攻能力太差，德國傳媒一般估計，今季佢哋喺德乙能夠護到級已算萬幸。

禾堡具滋哲勇得交關
禾夫斯堡上季中搵到前紐倫堡嘅實幹型教頭赫基過檔，又撬走埋雲達不來梅嘅忠臣Ｋ阿羅夫斯擔任體育總監，兩人合作令全隊士氣一流，球隊今夏保留全數上季主力，仲喺適當位置補充幾位優質新兵，當中尤以外借回歸嘅南韓中場具滋哲，喺季前熱身賽表現勇得交關，已成功搶得正選位置，配合迪亞高、比列錫同維爾連亞組成一條極富創造力中場，為箭頭奧歷製造機會。

「狼堡」財大氣粗，目前正全力追逐拜仁嘅巴西防守中場路爾斯古斯達禾，野心極大，加上歷史上兩次喺德國盃作客對卡爾斯魯厄都順利贏波晉級，今晚力足再贏。