打比郡新兵傾「力」響頭炮

猪拉多纳

今晚英冠上演首輪壓軸戲，由打比郡主場迎戰布力般流浪。咪以為打比郡有個「綿羊」外號，就覺得佢哋好蝦，查實打比郡季前借到英格蘭新星阿當史密夫，今晚對住防線「降呢」嘅布力般，要打響頭炮唔難，捧1.85倍主勝。 （開賽時間：周日晚11:00）

布力般齋簽免費球員
正選右閘巴福特轉投卡迪夫城，打比郡就即刻問熱刺借咗件阿當史密夫頂檔，咪睇阿當年紀輕輕好似人球咁，但其實佢深受熱刺器重，早前獲球會續約後，就繼續佢嘅外借吸收經驗生涯，阿當仔過往効力6間球會累積上陣過百次，「綿羊」家陣有佢助攻助守，戰鬥力肯定提升唔少。

另一件新兵基斯馬田，其實早喺年初已經以借將身份加盟打比郡，之後表現勁好，獲「綿羊」買斷，質素夠晒保證，轉會窗重開後，仲斟掂登地聯首席射手莊尼羅素，配合原有前鋒占美禾特同干拿杜利，各人為爭取正選，落到場肯定砌盡。

對家布力般季前有防線核心馬田奧臣離隊，淨係簽番件免費嘅湯美史浦做替補，兩件新援射手杜迪利甘保、中場哥尼伊雲斯又係唔使錢，唔係話免費冇好嘢，衰在湯美史浦的確唔夠班，甘保同伊雲斯今仗又因傷缺陣，得物無所用，布力般今鋪認真唔「老利」。