阿積士青年隊搏甩髀搶Ｗ

猪拉多纳

今晚首次參加荷乙嘅阿積士青年隊將會喺主場迎戰泰斯達，阿積士青訓體系譽滿全球，一向自給自足甚少使大錢買人，質素有保證，泰斯達深陷財困之餘，近況又曳，作客實畀呢班生牯仔恰死，阿King認為1.7倍主勝捧得過。

（周二凌晨2時開賽）

今季荷乙有三支來自甲組嘅青年隊加入，包括阿積士、川迪及燕豪芬，其中阿積士最值得留意，因為呢個「球星搖籃」曾出產過告魯夫、雲巴士頓、柏金及史奈達等著名國腳，據報一隊每周會將不需要嘅小將調落青年隊披甲，質素唔使懷疑，例如森軒迪歷斯、巴素亞、馬雲賀拿波底唔錯，只要喺乙組有料到，自然會畀一隊教頭法蘭迪保亞調番去踢甲組，實會搏甩髀。

泰斯達財困主力流失
相反，泰斯達深受財政問題困擾，被迫賣走一批主力，惟有起用更多年輕球員，同阿積士青年隊相比，明顯遜色不少。睇番泰斯達喺季前熱身賽輸多贏少，演出曳到冇朋友，今仗寧捧「阿青」旗開得勝。另一支征戰荷乙嘅川迪青年隊，之前熱身賽士哥頻頻，令球員信心大增，不過奧斯嘅火力亦唔講得笑，鬥攻格局揀大盤啱數。

最後瑞典超一哥希爾星堡，今季志切重奪聯賽冠軍，挾住三連勝氣勢，作客可輕取飄忽不定嘅佐加頓斯，讓平半非常值博。