法夫爾作客安聯有心得

猪拉多纳

慕遜加柏主帥法夫爾崇尚硬朗搶截作風，呢種踢法往往令拜仁吃盡苦頭，自從佢喺2011年2月上任後，慕遜加柏喺正式賽事同拜仁交手6次，成績2勝2和2負不落下風，而且兩場敗仗都係僅負1球，其中3次作客去到拜仁嘅安聯球場勝和負各一。

事實上，慕遜加柏近年財力同實力雖然無法同昔日風光時期相提並論，但對拜仁總有辦法，尤其開鑼戲，拜仁喺近15季德甲首輪賽事只輸過兩場，兩場都係輸畀慕遜加柏，包括前季德甲揭幕戰，由法夫爾領軍爆冷贏拜仁1比0。再數番慕遜加柏近5次作客對拜仁都未輸過超過1球，如果以今仗入球大細中位數計，5場波都開細盤。

至於拜仁，雖然上季聯賽首輪大勝格雷特霍夫3比0，但對手最終只係包尾大幡降班球隊，睇番之前4季，由08年起分別主場和漢堡2比2，作客和賀芬咸1比1，主場贏禾夫斯堡2比1同前季輸畀慕遜加柏，足見呢支德甲班霸向來慢熱。