燕豪芬照殺冇面畀

猪拉多纳

奈梅亨出靚女抹車打氣橋
荷甲球會奈梅亨為鼓勵球員，今季搞搞新意思，但凡球員取得每場比賽「Man of the Match」，即可獲贈免費洗車服務一次，最吸引地方係負責洗車嘅唔係一般洗車工人，而係三位穿着比堅尼嘅惹火女郎，相信可以激起一眾身為雄性動物嘅奈梅亨球員鬥志。

奈梅亨為咗令球員更積極比賽，結果度出呢個咁誘惑嘅獎勵計劃，首位「得益者」係冰島中場球員域陀柏爾臣，佢喺早前對西甲奧沙辛拿嘅熱身賽獲選為最佳球員，即時得到三位索爆比堅尼女郎幫佢洗車，睇見都夠過癮，佢仲影咗張相Post上Twitter「晒命」，認真得戚。好可惜球隊上周荷甲揭幕戰於主場以一比四大敗在格羅寧根腳下，想再有靚女幫佢哋洗車？相信要加倍努力喇！

上晒力「-2」照捧
講番奈梅亨今輪聯賽，作客撼爭標熱門之一燕豪芬。燕豪芬上周作客勝海牙三比二，表面上贏得好險，不過其實佢哋喺嗰場比賽早早領先三比○，為留力歐聯外圍賽先至會喺末段放軟手腳。如今球隊已在歐聯順利晉級，可以專心求勝，今場係佢哋今季聯賽首度主場出擊，戰意高昂，「讓球主客和」燕讓二球都要捧「讓球主勝」。（now 670及672周日凌晨2時45分直播）