奧格遇剋星 Sure「W」

猪拉多纳

羅拔仔4次交手o趙6粒
尋晚德甲開鑼戰由拜仁慕尼黑揭開戰幔，今晚就輪到另一支爭標分子多蒙特登場。「蜜蜂兵團」已經喺德超盃剃拜仁眼眉，證明放走馬里奧葛斯一樣冇問題，況且羅拔利雲度夫斯基出名係「奧格斯堡剋星」，「羅拔仔」轉會唔成谷埋成肚火，今晚仲唔搵奧格斯堡出氣咩，2.2倍「讓球客勝」捧得過！（有線61及201周六晚9:30直播）

多蒙特練波4千粉絲捧場
呢頭放葛斯，轉頭「羅拔仔」又因為轉會拜仁唔成鬧爆高層，唔少球迷都擔心多蒙特會冧檔。之不過從「蜜蜂兵團」以4:2勇挫拜仁捧走德超盃嘅表現嚟睇，球迷嘅憂慮可以一掃而空。強調只係唔妥高層，但同班隊友夾得好Happy嘅「羅拔仔」，喺周中嘅德盃踢得鬼咁搏命，末段仲埋齋協助球隊3球大炒威廉港，證明佢唔係得個講字，呢啲咪就係專業！「羅拔仔」過去4次鬥奧格斯堡足足入咗6球，擺到明恰死對手，今晚又再數胡有乜出奇？

多蒙特喺德國時間禮拜二進行為時75分鐘嘅公開操練，吸引咗近4,000名球迷到場，隊長曉姆斯有求必應猛咁幫球迷簽名，紐尼沙軒受訪時又大讚因足踝受傷仲未落得場嘅新兵米希達利恩好波，備戰情況睇落幾輕鬆喎！無他嘅，多蒙特上季聯賽兩鬥奧格斯堡分別贏3:1、4:2，歷來喺德甲亦未輸過畀佢哋，胸有成竹好正路。

奧格斯堡傷兵成籮
主隊奧格斯堡上季驚險脫離降班漩渦，體育總監路達都唔敢車大炮，坦言新季目標就係要護級，不過亨格比利擔心佢老人家個願望未必可以達成，畢竟球隊今夏最重要嘅收購，只係從特拉布宗羅致哈利艾天托普，呢位土耳其射手近兩年喺土超入得13球，回晒塘喇喎！仲有，中場費舒、華拿、左翼衞馬素迪莊同門將曼寧加全部倦勤，天殘地缺點頂得住多蒙特呀？

多蒙特熱身賽勁入波
連同季前熱身賽及盃賽，多蒙特近8場攻入24球。

雙方近4次對壘，多蒙特射手羅拔利雲度夫斯基攻入6球。

多蒙特上季聯賽作客開大比率高達71%。

蜜蜂兵上晒力「大」開殺戒
多蒙特進攻有幾勁a唔使多講，最緊要係球員狀態調整得好，季前熱身賽連場大捷，德國超級盃更攻到拜仁有氣冇碇抖。再者羅拔利雲度夫斯基當正奧格斯堡係「私房菜」，多蒙特近4次對碰攻入11球，呢隻「波蘭蜜蜂」包辦其中6球，今晚繼續開餐，吼實1.7倍入球大。