曼聯韋根大廝殺

猪拉多纳

社區盾開火爆曼郡打吡
今晚溫布萊球場上演英格蘭社區盾賽事，大曼徹斯特郡球隊曼聯同韋根正面交鋒，「紅魔鬼」進入後費格遜時代改由莫耶斯領軍，莫帥決心爭奪季內首個錦標，但大軍季前熱身賽表現一直唔對辦，今場讓到球半、兩球，要淨勝三球先收晒成個盤，風險極高，簡簡單單熱捧1.5倍大盤好過啦！

莫耶斯接手瓣瓣唔順
傳奇主帥費格遜管治曼聯廿六年半後宣告收山，今夏將帥位交畀蘇格蘭同鄉莫耶斯，當時有唔少人質疑莫帥欠缺執掌大會經驗，擔心佢帶唔掂「紅魔鬼」。睇番曼聯喺季前熱身賽演出，佢哋確實冇咗以往嗰道霸氣，喺日本兩站對住橫濱水手及大阪櫻花、作客瑞典對AIK蘇納都贏唔到，只能大炒雜牌軍澳職明星隊及香港球隊傑志，整體發揮確係唔多掂。

「紅魔鬼」今夏增兵唔多順利，簽唔到兩大目標法比加斯及堤亞高艾簡達拿都算嘞，莫耶斯仲搞唔掂有離心嘅朗尼，呢位英格蘭星級射手近日被安排同預備組練波，明顯被打入冷宮，今戰上陣機會唔大。曼聯前線可倚重上季神射手尹佩斯，但佢哋對上六場熱身賽全部有失波，剛喺周六凌晨嘅里奧費迪南紀念賽對西甲西維爾都失三球，後防堅唔穩陣。

韋根新兵格蘭荷特有料到
韋根由英超降落英冠後，今夏亦換帥，搵咗同樣來自蘇格蘭嘅奧雲高尼領軍，佢曾帶領般尼殺上英超，有啲料到，奧雲高尼今季幫球隊簽到唔少實用球員，最正係引入諾域治射手格蘭荷特，呢個大舊佬踢法簡單直接，頂上功夫一流，今戰有力威脅曼聯防線。翻查往績，對上四屆社區盾全部開大，四戰加埋入咗十八粒，入球大值得捧場。

近五屆社區盾成績
年度 冠軍 亞軍

2012 曼城 3:2 車路士

2011 曼聯 3:2 曼城

2010 曼聯 3:1 車路士

2009 車路士 2:2 曼聯

車路士12碼勝4:1

2008 曼聯 0:0 樸茨茅夫

曼聯12碼勝3:1