史浩克添火力響頭炮

猪拉多纳

漢堡每況愈下士氣差
首輪德甲壓軸戲史浩克04主場鬥漢堡，呢場傳統大戰到今日已褪色不少，史浩克維持強勢之餘，今季仲重點增強中前場火力，進攻點大幅提升，相反漢堡未見有走出低谷迹象之餘，季前組軍工作亦曳，戰鬥力每況愈下，黑柴深信史浩克有力輕勝一仗，推介2倍「讓球主勝」。

（有線61及201台周日晚11時30分直播）

史浩克上季喺臨時主帥贊斯基拿手上重上正軌，而佢亦因此得到球員支持同會方信任，得到長期合約，球隊上季取得殿軍得以參戰今屆歐聯，季前亦積極組軍，緬恩斯箭頭施沙拉爾、波琴天才哥列斯卡同科隆全面小將基斯甸基文斯加盟，為球隊中前場提供更多選擇，加上原有嘅達斯拿、亨特拉爾、法芬等優質攻擊手，球隊得分點極多，今晚主場迎戰走緊下坡嘅漢堡，相信可以輕易打開勝利之門。

漢堡前線損失嚴重
漢堡上季表現反覆，今季情況更令人擔心，南韓鋒將孫弘民畀利華古遜撬走，新加盟嘅中堅佐羅今仗因傷唔踢得。漢堡季前準備工作同熱身賽成績都極曳，之前強陣作客對德乙特雷斯登，竟然慘吞4蛋，中場大腦雲達華治唔知係咪覺得球隊冇前途，喺成個夏天都畀人夢遊感覺，熱身賽完全冇態。加上前線嘅單箭頭魯特尼夫斯賽前患咗嚴重流感，今仗上陣成疑，連呢個唯一得分點都不在最佳狀態，今仗作客輸兩、三球已經係最低消費。