岡薩多射爆FC橫濱

猪拉多纳

越南碧咸閃亮札幌迎國寶
「越南碧咸」黎公榮空降日乙隆重登場！黎公榮家有索女歌手嬌妻Thuy Tien，但仍加盟日乙球隊札幌岡薩多，全為挑戰自己，會方亦視呢位越南球王為救世主，已安排佢做死球專家。札幌岡薩多今輪主場迎擊FC橫濱，黎生賽前剛當選最佳東南亞球員，人氣爆燈，今場梗係撐主隊啦！（周日下午2時開賽）

現年27歲嘅黎公榮被封為「越南碧咸」，查實佢同英格蘭巨星碧咸又的確有唔少相似之處，佢喺越南係No.1人氣球星，而且同樣娶咗個女星做老婆。黎太Thuy Tien係越南著名歌手，同黎公榮被視為金童玉女，兩人經常出現喺當地娛樂版，真係有啲碧咸同辣妹feel。唔止咁，黎生同「萬人迷」一樣都係死球專家，佢仲抄足費高同C朗踢法，真係幾好波o架！

黎公榮09年曾遠赴葡萄牙効力歷索斯，但不被重用最終黯然返國。今次成為日本史上首個越南外援，獲得札幌岡薩多高度重視，加盟冇耐已被安排處理死球，喺隊中扮演重要角色。黎公榮日前於goal.com最佳東南亞球員選舉中獲得68.6%票數支持當選，佢話好期待今場同日本國寶三浦知良過招，岡薩多有咗呢個大紅人幫手，小讓平半可秤先。

飛腳超班大起黃蜂
同日日乙一哥大阪飛腳主場對福岡黃蜂，飛腳兩大新兵阿迪菲爾奴同宇佐美貴史踢到上晒身，大軍對上三戰場場入三粒，火力太勁，搞到班友只攻不守，今戰繼續大踢進攻足球，首選入球大。(周日下午5時開賽)