阿積士往績輸蝕

猪拉多纳

撐阿爾克馬爾「讓主」
有啲嘢得到未必好，好似荷超盃咁吖，捧盃嗰隊注定與聯賽冠軍無緣，剋死定律已經持續12年。阿積士今年抱住大無畏精神挑戰定律，成功與否有待時間驗證，不過今晚聯賽再遇荷超盃對手阿爾克馬爾，卡爾萬唔睇好佢哋作客贏波，撐2.15倍「讓主」。 （now670、672台周日晚8:30直播）

阿爾克馬爾上季以第10名過終點，攻守數據相比其餘中游分子都零舍醒神，雖然艾迪杜里同阿當馬希兩名攻擊手喺季前離隊，聯賽揭幕戰作客海倫芬仲落筆打三更輸波，不過佢哋最近喺聯賽、盃賽同阿積士7次對碰，錄得2勝4和1負靚績，硬淨數據唔到你唔信邪，有如荷超盃剋死定律一樣。

阿積士新兵未融合
阿積士左翼保爾列達過檔些路迪，教練法蘭迪保亞改以19歲丹麥新仔域陀費斯查擔正，首輪攻破洛達大門後，即刻激讚教練鼓勵佢自由發揮，又話拜仁翼鋒列貝利係好例子，後生仔隨時被勝利衝昏頭腦，再者借將保贊雖然正選落場，不過同隊友默契明顯有待加強，兩翼側擊存在隱憂，今場面對「剋星」阿爾克馬爾未必惡得出樣。