英軍剃蘇唔落力

猪拉多纳

身嬌肉貴踢太公波
繼5月鬥愛爾蘭後，英格蘭迎來另一場「英倫三島打吡」，周四凌晨於溫布萊球場鬥「細佬」蘇格蘭。「三獅兵團」有史杜列治、安祖卡路爾因傷落選，朗尼亦毫無狀態；加上英超開鑼在即，英軍班大帝隨時就住踢，面對硬淨蘇格蘭入波唔慌多，捧細！（now 621周四凌晨3時直播）

於英倫三島，英格蘭一向係大佬，但5月尾對住愛爾蘭，「三獅兵團」戰意奇低，最後主場僅和對手1比1，演出毫無亮點。講句衰啲，英軍不嬲見高就拜、見低就踩，早前兩對巴西搏晒老命，主場贏出開心到震，但對住「細佬」愛爾蘭就冇厘神氣，真係見到都唔開胃。喺英格蘭心目中，蘇格蘭地位甚至不如愛爾蘭，球隊隻「懶醒心魔」又會發作，好有機會又hea踢。

靠禾確特攻堅唔慌有用
另外，此類熱身賽無關痛癢，英軍班球星個個都身嬌肉貴，一個唔覺意整傷咗、缺陣新季英超就真係喊都無謂，今戰就算有主場之利，都唔使旨意班大帝會落力比賽。

對於前線兵微將寡，領隊鶴臣多多理論，話黑山係有兩個勁前鋒（祖維迪同胡仙歷），但都唔係天下無敵，試圖表達就算冇勁前鋒在陣，都唔會影響英軍攻力。但環顧今仗人腳，只有狀態大勇嘅禾確特較有威脅，要撕破蘇軍後防唔係話咁易。

史特根執靚蘇軍防線
史特根喺今年1月開始執掌蘇格蘭，麾下戰績雖僅2勝2負，不過後防係穩固咗，而且搓波、控制比賽節奏等亦有進步。上仗作客克羅地亞，全場捱打都頂得住，雖然得保不失係有幸運成分存在，但後防演出硬淨亦值得一讚。今次作客鬥「大佬」係史特根省招牌好機會，但佐敦洛迪斯、辛迪加斯等前鋒有幾多料，史帥心中有數，呢場肯定以守代攻，預料戰情同之前英軍鬥愛爾蘭差唔多，細盤有1.9倍值捧。