意大利戰意盛撐「主勝」

猪拉多纳

阿根廷近況曳　缺美斯惡唔出樣
意大利同阿根廷時隔12年後首次碰頭，雙方今晚會喺羅馬拍跳，為向教宗方濟各致敬而戰。「解凍」射手奧斯華度難得獲意大利主帥柏蘭迪利重召，今晚「倒戈」勢必出盡渾身解數證明身價，對住缺少美斯兼近況麻麻嘅阿根廷可秤先，捧2.4倍「主勝」。（now632台及廣東體育周四凌晨2:45直播）

國際賽檔期有場咁堅嘅戲碼，皆因意軍主帥柏蘭迪利極力安排，佢老人家勁崇拜教宗方濟各，幾個月前就提議喺羅馬奧林匹高約戰阿根廷，希望兩隊踢番場好波向教宗致敬。雙方賽前唔單止會入住同一間酒店，仲會獲方濟各喺梵蒂岡接見，不過消息就話教宗未必會入場睇波。

意大利喺洲際盃奪季軍，僅負西班牙同砌低烏拉圭嘅表現有晒交代，柏蘭迪利今次主要揀番洲際盃班底出戰，並且徵召恩斯治尼、費奧倫斯同馬高華拉堤3位喺U21歐國盃有出色表現嘅小將，但講到焦點人物，肯定非阿根廷出世嘅奧斯華度莫屬！

奧斯華度解凍「倒戈」
呢位因為紀律問題冇份踢洲際盃嘅前鋒，今次獲「解凍」重召，佢喺羅馬仲有冇碇企係未知數，加上巴洛迪利因為膝部有傷缺操大有機會唔踢，將會擔大旗嘅奧斯華度為球會同國家隊前途着想，已經講明會搏盡爭「士哥」，對住「祖家」都肯定冇情講！

意大利有巴洛迪利缺陣，阿根廷呢邊仲大鑊，據《每日體育報》透露，前日飛抵羅馬嘅美斯，因為左腳大腿肌肉痛已經缺席巴塞鬥馬來西亞明星隊場波，阿根廷軍醫話佢傷患未好番，所以唔想冒險派呢位「球王」落場。要知道阿根廷早排表現跌晒Watt，喺世盃外圍賽連環失分畀玻利維亞、哥倫比亞同厄瓜多爾，冇埋美斯可以做得啲咩先？梗係捧意大利着數啦！