賓菲加誓斷波圖龍脈

猪拉多纳

連續3年做二奶忍夠了
葡超今晚開鑼，近年已由傳統波圖、賓菲加、士砵亭「三強鼎立」演變成「雙雄之爭」。波圖上季憑後勁贏賓菲加1分捧盃，但呢支班霸季前易帥，兼出售兩位中場猛將摩天奴及占士洛迪古斯，表現仲有待觀察。賓菲加得保主力，當然不甘於再做「二奶」，勢必大踢爭氣波，今季可望做番齣好戲。

波圖易帥影響衞冕
波圖成為葡超3連冠，賓菲加就做足3季「二奶」，賓菲加由10/11年球季輸成21分，到上季僅以1分飲恨，足見雙方嘅實力差距一季比一季近，今季係重奪聯賽錦標嘅大好時機。事關過去兩季率領波圖捧盃嘅教練域陀佩利拉已經離隊，改由前費利拿主帥保羅方辛加接手，呢位40歲少帥以往教開細球會，上季為費利拿奪得聯賽季軍，隨時只係曇花一現。

另外，唔好忘記域陀佩利拉坐正波圖帥位前，其實已經喺球會擔任助教及青年軍工作多年，唔需要適應，保羅方辛加依家突然空降，恐怕未必能順利過度，亦令波圖爭取衞冕增添不明朗因素。

開鑼戰捧布拉加上盤
至於開鑼戰費利拿主場對布拉加，費利拿除咗「精神領袖」保羅方辛加跳槽波圖之外，球隊將於下周中出戰歐聯附加賽首回合主場鬥俄超辛尼特。費利拿難得可以踢大賽，肯定集中力量備戰，暫將聯賽放喺次要位置，受讓平半都要唔過，寧揀布拉加上盤。（周六凌晨3時15分開賽）