對哈化都要失6粒 法蘭克福任「仁」砌

猪拉多纳

德甲嚟到第2周，今晚有法蘭克福主場迎戰上季「3冠王」拜仁慕尼黑！去季表現可人嘅法蘭克福喺開咧戰以1:6慘負升班球隊哈化柏林，防線弱點表露無遺，今仗對住拜仁睇怕又要大敗一場，一於強捧1.6倍「讓球客勝」啦！（有線61及201周六晚9:30直播）

拜仁默契愈嚟愈好
雖然小妹覺得法蘭克福上仗對哈化柏林嗰陣勁輕敵，所以搞到輸鑊甘，但心理質素始終係足球比賽嘅重要一環，而且佢哋條防線真係存在住明顯漏洞，除咗門將奇雲查普長抖完冇耐需要時間重拾狀態，中堅森拜奴亦表現得非常懶散，失6球絕對係「抵死」，今晚鬥拜仁仲要有正選右閘施巴斯坦真格有傷踢唔到，屋漏兼逢連夜雨，畀人炒多鋪都唔奇。

拜仁首戰以3:1輕取慕遜，呢場波班球星純粹以質素取勝，仲未熟得晒哥迪奧拿嘅新戰術體系，經過一個星期，相信班大帝同哥帥嘅默契會更加好。睇番開咧戰，拜仁嘅進攻保持一貫強勢，新兵馬里奧葛斯上星期更加喺熱身賽一復出就省兩粒，有佢拍住湯馬士梅拿、洛賓同文迪蘇傑等巨星，入多幾球又有幾難先？