PSV慢熱博2.1倍半場細

猪拉多纳

朴智星回歸首演未夾熟
新球季眨吓眼就殺到埋身，《太陽波經》都為各位波友準備大堆新欄目，希望幫到大家搵餐晏仔！《Betting Zone》今日首次同大家見面，先送畀各位讀者2.1倍燕豪芬半場細，今晚有朴智星首演嘅PSV今季表現傾向慢熱，就算對手係實力平平嘅伊高斯，半場頂盡都係領先1球格局。（now670及672台周日凌晨0:45直播）

開季4戰得1場半場大

足智彩半場入球大細中位數基本上定喺1.5球，即係半場兩邊只炮製1粒入波或者開唔到紀錄，就係開細。究竟係咪好容易？只要你睇睇今日咁多場波半場大細賠率，佔絕大部分個半場細都喺1.6倍以下就可知一二，即係莊家普遍都相信開細機會高一截，風險細所以回報率偏低，你隨時合埋眼都可以剔中幾場細囉！

講到咁Easy，咁推介燕豪芬半場細係咪好冇卡士？有冇卡士其實唔多重要，最緊要係有冇把握，我揀呢場係全日最冷嘅半場細，表面睇足智彩認為最有機會開半場大係呢場至真。唔係刻意叫大家拗頸，只係覺得真係有值博之處。

冇錯，PSV上季全季開出半場大比率有55%（見表），主場開大更去到60%，不過如果大家睇番佢哋開季至今，2場歐聯外圍賽同2場聯賽共4場波，雖然夾埋入咗13球，4場有3場全場開大，但只係得1場開得出半場大，可能係季初波，始終傾向慢熱。

伊高斯新升班火力弱

再者，燕豪芬今季打起咗個17歲比利時天才小豆丁薩卡利亞巴卡利，上仗對住奈梅亨就上演帽子戲法，之後再入選埋比利時大國腳，不過，今晚佢因為鼠蹊傷唔出得，少咗支火箭炮，入波減少唔出奇。至於話搞掂晒工作證，今晚會着起33號波衫登場嘅「星爺」，同隊友都仲需要提升默契，半場時間連熱身都未夠，仲點會多波入，即使對手伊高斯係新升班實力麻麻火力唔強，都咪寄望半場就炒起對手。