先入為主 觀念難變

猪拉多纳

　　噚日講到香港柴台文化，雖然話騎師薪高糧準，份人工可能已包埋被馬迷「開汽水」，即係食得咸魚抵得渴，唔好有怨言。但有時可能佢哋係啞子食黃蓮，有苦自己知。

　　長久以來，熱門馬熱倒招來被噓，通常梗係個騎師被插，一定係話個騎師跑得唔好，冇畀心機去跑。而馬迷降罪於佢哋身上，係一種情緒發洩，唔會太過理性，有啲仲會打橫嚟。諗深一層，點解唔會噓練嗰個，難道匹匹熱門死火，真係與練馬師無關？

　　馬匹比賽時衝得唔勁，或者唔夠專心，騎師唔會幫到幾多，有可能係賽前谷得唔應、訓練未夠好，呢啲係練馬師份內事，與騎師沒有關係。不過，係好係醜，第一念必放在騎嗰個身上，呢種觀念相信好難改變。