莫連奴回歸 大宴車迷

猪拉多纳

寸王莫連奴今夏回巢重掌車路士，聯賽首戰坐鎮史丹福橋主場撲擊升班球隊侯城，莫帥之前帶領車仔喺聯賽主場保持60戰不敗，賽績堅硬淨。侯城老細阿拉姆（Assem Allam）幫球隊改名叫侯城老虎，但呢班波只係冇牙老虎，頂唔住車仔狂轟，莫帥回歸頭炮可大勝一場答謝車迷支持，熱捧入球大，再取「讓球主勝」！

（now 620及621周日晚11時直播）

主場唔識輸字點寫
車路士今夏最重要收購係搵番莫連奴歸位，佢闊別英超近6年，仍屬車迷至愛。呢個超級教頭04至05季度上「車」，當季即以95分破英超紀錄奪冠，佢帶隊3年零3個月期間贏得英超及聯賽盃冠軍各兩次，又捧過足總盃同社區盾，連曼聯傳奇教頭費格遜都怕咗佢。喺莫帥帶領下，車路士聯賽主場60戰46勝14和，主場出擊唔識個輸字點寫！

莫連奴早於02年帶波圖時期開始製造呢個主場恐怖紀錄，及後執教車路士、國際米蘭同皇馬將個人主場聯賽不敗數字增至150場，直到2011年4月皇馬不敵希杭先至斷纜。而車仔喺阿布入主後過去10季聯賽主場首戰例贏（見附表），除鬥勁敵曼聯同阿仙奴僅小勝1粒，其餘賽事例必開大，佢哋曾於09年面對侯城，當年只係小勝2比1，但今次有超強新帥效應刺激，一定盡數對手。

侯城改名冇乜人騷
車路士今夏引入德國球星舒賀爾尼及荷蘭小將雲堅基爾，中場人手充裕，佢哋又由西布朗收番射手盧卡古，前線仲有費蘭度托利斯同丹巴巴亞，幾大射手爭位，對侯城搶入波絕不手軟。侯城老細阿拉姆今夏將球隊改叫侯城老虎，仲特登設計咗一件橙黑直間狀似虎紋嘅新球衣，希望推廣球會品牌，可惜英超賽會卻唔多理佢，官方仍然照叫番侯城，甚至連佢哋目己嘅球迷都話改名十分「無厘頭」。

不過，無論改名好換新衫好，呢支升班球隊最大問題係前線冇料到，新特蘭借將丹尼格拉咸上季尾已有啞火迹像，另一箭頭恩歷克沙保亦唔係咁掂，去到史丹福橋勢被圍攻，大敗係意料中事。

莫連奴(車路士)：上季車路士四分五裂，我希望重整呢個「藍色的家」，我希望球迷支持球隊同球員，不論高低起跌，一直與我哋同在！

布魯士(侯城)：我希望所有球員喺場上證明自己真係夠料打英超，以前佢哋會質疑自己，依家要把握機會好好表現，我深信佢哋夠班！