費Sir退休熱門不穩

猪拉多纳

英超剛啱上演過首輪賽事，相信球迷對各支球隊都有初步了解。對於一班資歷較深嘅球迷嚟講，今個英超球季感覺較為特別，因為曼聯後備席唔會再睇到費格遜。失去咗一位具叫座力兼有魅力嘅領隊在場，心理上好似若有所失。但正所謂天下無不散之筵席，相信隔多兩三個月，球員及球迷就可以適應過來。

當然，「寸王」莫連奴回歸車路士亦係一個焦點。費Sir退休後，莫連奴就成為英超其中一個具級數嘅領隊。Peter知道好多「車迷」都對莫帥回歸有好大憧憬，但現時就話車路士有能力取得最後勝利實在言之過早，始終暑期轉會市場要到九月先至關閉，仲有時間畀大球隊進行重磅收購，球隊戰鬥力可以喺大約兩星期內出現好大變化，爭標形勢隨時會翻天覆地。

總括而言，費Sir退休令英超出現禾雀亂飛局面，今季隨時會有異軍突起。Peter喺度引用一句賽馬術語，就係熱門不穩。咁究竟邊隊叻啲，睇到下個月中應該有眉目，屆時同大家再分享。

德西仲係四隊之爭
除英超之外，德甲同西甲都已展開新一季角逐。比起英超，德、西形勢相對較為單純，兩個冠軍只得四隊爭。德甲有拜仁及多蒙特，前者粒粒皆星實力早已證明，後者有高普呢位有料之人領軍，今季一樣有強大競爭力。西甲冠軍之爭離唔開皇馬及巴塞，皇馬有安察洛堤執教，佢贏過英超、意甲及法甲冠軍，經驗豐富對皇馬爭標必有幫助。巴塞有巴西球星尼馬加盟，屬新季巴塞最大看點。

金句：一個wide open的英超球季