巴塞衛冕第一擊 尼馬擔正做大騷

猪拉多纳

巴塞今晚展開衞冕西甲第一擊主場迎戰利雲特。呢場係「地上最強」新帥馬天奴接掌後嘅首場正式賽事，梗係要好好睇睇，雖然美斯剛傷愈未必擔正，但有「新比利」尼馬配合埋巴塞原有班底，要數番幾粒都唔係問題，加上佢哋仲未買到具質素中堅填補後防漏洞，入得又失得，入球中位數開到3.5，都照捧1.59倍入球大啦！（now632台周一凌晨1:00直播）

馬天奴今場會成為巴塞近30年嚟，第10位喺西甲開咧日迎來處子戰嘅教頭。呢位阿根廷教頭一上任，就獲得一眾球星激讚，沙維仲話：「佢係個天生領袖，唔止好有才能同經驗，工作上亦準備充足。」上任冇耐已經咁得人心，唔怪得「地上最強」喺季前熱身賽嘅表現咁對辦啦！佢哋喺6戰中獲得4勝1和1負，更有3場攻入至少7球添！

美斯復操準備搏殺
今場嘅焦點毫無疑問將會落喺巴塞新援尼馬身上，呢位「新比利」除咗奪得應屆洲際盃嘅最佳球員外，喺熱身賽亦都已經「開齋」，馬天奴盛讚佢已經極速融入球隊，當然要入番幾粒打響頭炮啦！依家就連前日啱啱復操嘅美斯、法比加斯同柏度洛迪古斯都仲話要落場搏殺，就知巴塞上下士氣幾咁高。

利雲特有力偷雞
不過「地上最強」都唔係冇隱憂o架，巴塞上季喺歐聯點樣畀拜仁「血洗」，小妹仲記得好清楚，中堅位置係佢哋弱點，不過到呢刻都仲未買到人，今場仍然靠碧基一個頂住，馬斯真蘭奴要繼續做替工，意味住防線漏洞仍然存在。

利雲特同「地上最強」嘅實力雖然相差一段距離，但佢哋喺熱身賽表現唔錯，加上有艾雲舒捷斯同阿萊斯朗恩呢啲攻擊手來投，隨時可以靠反擊喺巴塞身上偷雞。