賽前巡禮咪遲

猪拉多纳

　　馬匹賽前巡禮，俗稱行沙圈，有時都會畀馬迷噓爆。

　　原因好簡單，就係唔守時！嗰場賽事啲馬隻隻遲到，搞到沙圈靜如深海，烏蠅飛過都聽到，入場馬迷冇嘢睇、等得耐，點會唔鼓譟。

　　最慘仲係啲馬遲出亮相圈，馬會又唔補番時間，好似走馬看花咁，行得一陣，騎師就上馬，啲馬滾水淥腳咁全部走晒出草地，喜歡睇臨場嘅朋友，都未望真，又點會有心水。

　　以心為心，好多馬迷因為鍾意湊熱鬧，覺得沙圈氣氛好，又可以近距離睇到馬，先至會山長水遠走入沙田馬場。但馬匹賽前巡遊時候唔充分，佢哋實會唔爽，唔輸錢猶自可，若果輸得三兩場，已經躁底，又冇馬俾佢哋睇，一定噓得有咁大聲得咁大聲。