曼城豪陣撲擊喜鵲

猪拉多纳

受紅魔屠鵝刺激 殺意大盛

英超頭輪最後一場由富豪球會曼城守尾門，主場出戰英超「法國兵團」紐卡素，曼城今夏豪使近1億歐元（約10億港元）擴軍，今次可盡情大晒豪華攻擊陣容，眼見同市死敵曼聯剛於周日凌晨大炒「天鵝」史雲斯，更能激起曼城將帥爭勝決心，今仗定全力撲擊「喜鵲」，何況兩軍近季於曼城主場交手頻演入球騷，捧大穩陣！

（now 620及621周二凌晨3時直播）
讓得太多 上盤玩唔過

曼城老細文梳亞請完主帥文仙尼食無情雞，跟手由西甲馬拉加撬走智利「工程師」比歷連尼領軍，再拎出1億歐元畀佢招兵買馬，目標非常明確，就係要由死敵曼聯手上重奪英超霸主之位，同時於歐聯挑戰歐洲列強。

隨住射手尼格度、祖維迪同快翼捷西斯拿華斯等猛人來投後，曼城擁有全英超最強攻擊陣容，前線可以搵阿古路拍尼格度或迪斯高，甚至安排後兩者玩雙塔戰術，任你點變都得，弱旅遇着佢哋，即使採取穩守甚至死守戰術都未必有用。

不過，曼城亦並非全無弱點，佢哋今季最大隱憂係防線後備力量不足，中堅拿斯達錫今仗因傷缺陣，已經要用到尼史葛夥拍隊長高柏尼扼守中路，尼史葛話就話係英格蘭邊緣國腳，但頂盡只係歐洲二、三流中堅，一句講晒，冇卡士！門將赫特以往表現可靠，但近排陣上慌失失，代表英格蘭時更大出洋相，球隊於季前熱身賽對阿仙奴及AC米蘭都失3球，似乎唔係偶一為之，今戰讓到球半/兩球略嫌太多，上盤玩唔過。
法國幫孭飛 負隅頑抗

紐卡素今夏於轉會市場冇乜大動作，主要收購係由昆士柏流浪借用法國射手雷米，陣內法國兵增至11人。「喜鵲」法國幫勢力不斷膨脹，正面睇班友同聲同氣，可縮短磨合時間，但其他幫派完全失勢，特別係本土派冇晒地位，好容易造成更衣室分裂嘅局面。

不過，雷米今戰受傷暫時未可披甲，但好彩仲有兩大進攻重心賓艾化同柏比斯施斯撐住，尚有多少反擊能力。翻查往績，曼城近5次主場對紐卡素全勝兼全大，因此繼續追大係正路選擇。
領隊Chit Chat

比歷連尼（曼城）：我哋有4個前鋒，依家我都唔知派邊個出場。但無論最後選擇係點結果都係一樣，因為佢哋個個都咁勁。

柏杜（紐卡素）：我哋冇曼城咁有錢，根本冇得比。上季喜鵲表現唔好係事實，所以外界對我哋冇乜期望或者係件好事。