近況弗爆主場威力勁 睇好柏林聯有杜理

猪拉多纳

德乙獨腳戲，柏林聯主場大戰杜塞爾多夫，兩隊近況南轅北轍，主隊開季脫腳後，已經重回正軌，而且愈踢愈好，作客都取得兩連勝，返回自己地頭，更加冇理由失威。反觀杜塞爾多夫有頭威冇尾陣，上仗主場都輸得，表現認真失禮。踢波好多時靠氣勢致勝，寧捧當頭起，莊家開平手盤更加要撐柏林聯。

（周二凌晨2時15分開賽）

柏林聯首兩輪聯賽連續失分，主因受傷兵問題影響，但教練諾伊豪斯已作出合適調整，球員亦適應咗人腳唔齊情況下比賽，一人走多一步，愈踢愈起勁。早前德國盃反勝雷根斯堡，突顯頑強鬥志，上仗半場攻入特雷斯登3球，更加係信心嘅表現。最重要係柏林聯主場威力一向強大，上季聯賽主場成績位居第3，既然作客都踢到曉飛，返回自己地頭，有fans打氣，應該會有更佳發揮。
杜塞爾多夫攻力疲弱

杜塞爾多夫雖然由德甲「空降」落來，但踢起上來並冇明顯優勢，球隊中場組織力弱，太依賴前鋒賓斯卓普單打獨鬥，進攻效率甚低，由之前3個聯賽所取得嘅入球，有兩球靠12碼入波，可見其攻力認真一般。翻查往績，杜塞爾多夫過去6次作客柏林聯錄得1勝1和4負劣績。既然近況、往績，柏林聯都佔上風，平手盤坐和望贏。