燕豪芬復仇AC

猪拉多纳

未忘05歐聯4強惜敗之痛

新一屆歐聯附加賽展開，兩回合晉級球隊可直入32強分組賽。周三凌晨燕豪芬主場對AC米蘭，重演05年4強經典對決。當時燕軍孖寶高古及朴智星建功，無奈失作客入球飲恨出局，兩人闊別8年後今季重逢，恍如隔世，高古已成燕豪芬主帥，而星仔亦由英超回巢。對當年惜敗二人心仍在痛，故必全力踢走AC晉級主賽圈。燕豪芬喺高古率領下開季5戰全勝，可趁AC米蘭兵疲缺態先拔頭籌，平手盤揀主隊。

（有線61及201台周三凌晨2時45分直播）
搞掂工作證 星爺踢得

兩軍喺04至05年度歐聯4強相遇，燕豪芬首回合輸0比2，次回合主場朴智星打開紀錄，高古梅開二度，但完場前失波，即使贏3比1，但兩回合計打和3比3，輸作客入球出局，戰情激烈實屬經典。此後朴智星轉投曼聯，同高古分道揚鑣，估唔到8年後二人故劍重逢。

高古今夏執掌燕豪芬，呢位42歲少帥教波有板有眼，加上佢身為球隊名宿，深得球員擁戴，肯為佢賣命，難怪燕豪芬上圈歐聯加聯賽，5戰5勝共轟入16球，表現勢如破竹。而朴智星喺英超拚搏8年後重返成名地，雖然年紀不輕，但以佢經驗仍然足以喺荷甲立足，而佢上周中終於獲荷蘭當局發出工作證，今仗將被列入後備名單隨時候命，作回歸母會後嘅首秀。
傷兵滿營 巴神又缺態

意甲將於周末先至開鑼，ＡＣ開操比較遲，最大鑊係頻頻出現傷兵，邦利拿、羅賓奴、麥薩斯、迪施基利奧等人，先後受唔同程度傷患，影響備戰工作。巴洛迪利更加係自6月洲際國家盃以來一直有傷在身，甚至一度傳佢今仗難以披甲。雖然「巴神」已於日前熱身賽復出，但以佢目前狀態，恐怕唔足以應付今場高強度大戰。

計往績ＡＣ近兩次作客燕豪芬都係輸波而回，更何況現時氣勢、狀態處於下風，今仗更難發圍，或者都係疊埋心水待次回合返主場再搏殺好過。