年輕班底夠殺 AC客W好「芬」

猪拉多纳

PSV星散冇料到

歐洲各地主要聯賽啱啱先開番，歐聯附加賽就有大牌球隊對碰！今晚首回合荷甲班霸燕豪芬（PSV）喺主場硬撼意甲AC米蘭，兩回合晉級一隊直入32強分組賽。主隊超新星薩卡利亞巴卡利仲未100%肯定趕得切復出，但AC就有奇雲保定擔正，同艾沙拉維及巴洛迪利組成勁爆鐵三角攻堅，信得過佢哋火力，可以直取2.52倍客勝。

（有線61及201、中央5台周三凌晨2:45直播）

年輕化嘅AC米蘭近年喺歐聯都有唔少閃亮表現，相反燕豪芬好似同歐聯已經脫咗節咁，兼且呢個暑假又走咗大批主力，小弟認為AC米蘭喺呢輪對決應該可以輕鬆晉級。事實上，AC近年換血做得唔錯，巴洛迪利、艾沙拉維同奇雲保定呢個進攻鐵三角，有青春、有活力、有質素兼有卡士，近兩季佢哋有過炒阿仙奴4球同贏巴塞隆拿2球嘅風光一頁，即使最終都畀巴塞反勝踢出局，一樣抵讚！
AC巴洛迪利傷愈回歸

雖然佢哋今夏無特別增兵，但年輕班底亦幾乎留低晒，預計合作性同成熟度會進一步提升，就算巴西前鋒羅賓奴有傷，但王牌射手巴洛迪利康復回歸，火力唔成問題。況且意甲呢個禮拜先開鑼，AC可以集中精神寓賽於操，贏咗呢場為新季意甲壯膽都仲得，雙贏呀！

燕豪芬唔經唔覺已經缺席歐聯4個球季，就算轉踢歐霸盃亦攞唔到咩成績，個Background麻麻哋咋噃！最大劑係佢哋上季幾個主要功臣，好似史杜特文、謝明蘭斯同梅頓斯都已經齊齊離隊，日前仲賣走埋巴西後防馬些路安東尼奧，實力比起上季削弱咗唔少。
燕豪芬新星有傷頂硬上

本來佢哋今季打起咗個17歲比利時仔薩卡利亞巴卡利，可惜佢上星期喺國家隊操練意外受傷，即使主帥高古睇好佢可以趕及傷愈復出，不過狀態難免受影響囉。就算話佢哋今仗會有中場舒赫斯同防線主力列卻克回歸正選，但呢鋪撞着7屆冠軍AC，憑咩去阻人哋晉級呀？
燕豪芬連開4場大

燕豪芬連續4場比賽開入球大。

燕豪芬近5場共入16球。

AC米蘭近5場熱身賽取得3勝2負。
頂占筍盤：AC米蘭（客勝）