韋根大「打」爭氣波

猪拉多纳

射手誓做「列基林拔第二」

英冠今晚上演獨腳戲，韋根喺主場對唐卡士打，有機會開熱W翻身。雖然韋根最近連輸兩場兼冇波入，不過新領隊奧雲高尼都冇灰心，仲鼓勵射手格蘭賀特繼續騷哥利，爭取入選英格蘭國家隊，佢老哥都話準備好喺英冠發威，1.4倍主W要捧！

（開賽時間：周三凌晨2:45）

韋根開咧戰作客淨數班士利4蛋，點知喺社區盾以0:2不敵曼聯後，日前返到聯賽又以0:1慘負般尼茅夫，而且有上屆足總盃捧盃英雄卡林麥馬拿文領紅牌，今場要停賽。不過咁，韋根領隊奧雲高尼強調，今季組軍情況令佢好滿意，有信心領軍升班殺番上英超喎。
唐卡士打新帥冇料

奧雲高尼眼見修咸頓射手列基林拔為英格蘭國家隊上陣大獲好評，鼓勵由諾域治加盟嘅格蘭賀特，畀心機入波等國家隊徵召。事實上，格蘭賀特自己講過，願意由英超降格踢英冠，就係因為覺得諾域治踢法太保守唔啱佢，返到主場肯定搏命入波。

對家唐卡士打由新帥迪高夫領軍，佢哋首戰以1:3不敵黑池後，出戰聯賽盃同聯賽先後打沉羅奇代爾同布力般反彈，好似好掂咁。但問題係，迪高夫上任前連奧咸都帶唔掂，英甲冠軍唐卡士打搵佢接手，真係禍福難料，撐唔過！